041.0453.200605
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏ
ՈՐՈՇՈՒՄ
20 հունիսի 2005 թվականի N 453-Ա
i
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՏԱՐԱԾՔԱՅԻՆ ԿԱՌԱՎԱՐՄԱՆ ՆԱԽԱՐԱՐԻ, ՈՐՊԵՍ ՀԱՄԱԿԱՐԳՈՂ ՆԱԽԱՐԱՐԻ, ԼԻԱԶՈՐՈՒԹՅՈՒՆՆԵՐԻ ՇՐՋԱՆԱԿԸ ԵՎ ԳՈՐԾԱՌՈՒՅԹՆԵՐԻ ԻՐԱԿԱՆԱՑՄԱՆ ԿԱՐԳԸ ՍԱՀՄԱՆԵԼՈՒ ՄԱՍԻՆ
Հիմք ընդունելով Հայաստանի Հանրապետության Նախագահի 2002 թվականի մարտի 16-ի «Հայաստանի Հանրապետության կառավարության գործունեության կարգը սահմանելու մասին» ՆՀ-1064 հրամանագրի հավելվածի 3-րդ կետը և 2005 թվականի ապրիլի 27-ի «Հ. Աբրահամյանին Հայաստանի Հանրապետության տարածքային կառավարման նախարար նշանակելու մասին» ՆՀ-74-Ա հրամանագրի 2-րդ կետը`
1. Սահմանել, որ`
ա) Հայաստանի Հանրապետության տարածքային կառավարման նախարարն իրականացնում է համակարգող նախարարի գործառույթներ` առողջապահության, գյուղատնտեսության, կրթության և գիտության, մշակույթի և երիտասարդության, աշխատանքի և սոցիալական, քաղաքաշինության, անշարժ գույքի ու ֆիզիկական կուլտուրայի և սպորտի ոլորտներում,
բ) համակարգող նախարարը սույն որոշման 1-ին կետի «ա» ենթակետում նշված ոլորտների հանրապետական գործադիր մարմինների ղեկավարներին` Հայաստանի Հանրապետության առողջապահության նախարարին, Հայաստանի Հանրապետության գյուղատնտեսության նախարարին, Հայաստանի Հանրապետության կրթության և գիտության նախարարին, Հայաստանի Հանրապետության մշակույթի և երիտասարդության հարցերի նախարարին, Հայաստանի Հանրապետության աշխատանքի և սոցիալական հարցերի նախարարին, Հայաստանի Հանրապետության քաղաքաշինության նախարարին, Հայաստանի Հանրապետության կառավարությանն առընթեր անշարժ գույքի կադաստրի պետական կոմիտեի նախագահին, Հայաստանի Հանրապետության կառավարությանն առընթեր ֆիզիկական կուլտուրայի և սպորտի պետական կոմիտեի նախագահին, ինչպես նաև Հայկոոպի վարչության նախագահին տալիս է հանձնարարականներ և իրականացնում դրանց կատարման նկատմամբ վերահսկողություն,
գ) համակարգող նախարարը Հայաստանի Հանրապետության վարչապետի հանձնարարությամբ` սույն որոշման 1-ին կետի «բ» ենթակետում չնշված հանրապետական գործադիր մարմինների ղեկավարներին, ինչպես նաև Հայաստանի Հանրապետության սոցիալական ապահովագրության պետական հիմնադրամի նախագահին տալիս է հանձնարարականներ և իրականացնում դրանց կատարման նկատմամբ վերահսկողություն,
դ) համակարգող նախարարը գործում է Հայաստանի Հանրապետության օրենսդրությանը համապատասխան և իր խնդիրներն իրագործելու նպատակով իրականացնում է Հայաստանի Հանրապետության օրենսդրությամբ և սույն որոշմամբ իրեն վերապահված լիազորությունները:
2. Սույն որոշումն ուժի մեջ է մտնում ընդունմանը հաջորդող օրվանից:
ՍՏՈՐԱԳՐՎԵԼ Է ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏԻ ԿՈՂՄԻՑ
2005 ԹՎԱԿԱՆԻ ՀՈՒՆԻՍԻ 20-ԻՆ