ՀՅՈՒՊԱՏՈՍԱԿԱՆ ՀԱՐԱԲԵՐՈՒԹՅՈՒՆՆԵՐԻ ՄԱՍԻՆ ՎԻԵՆՆԱՅԻ ԿՈ ...

ՀՅՈՒՊԱՏՈՍԱԿԱՆ ՀԱՐԱԲԵՐՈՒԹՅՈՒՆՆԵՐԻ ՄԱՍԻՆ ՎԻԵՆՆԱՅԻ ԿՈՆՎԵՆՑԻԱՅԻ`
ՔԱՂԱՔԱՑԻՈՒԹՅՈՒՆ ՁԵՌՔ ԲԵՐԵԼՈՒ ՄԱՍԻՆ ՖԱԿՈՒԼՏԱՏԻՎ ԱՐՁԱՆԱԳՐՈՒԹՅՈՒՆ

Սույն Արձանագրության, ինչպես նաև 1963 թվականի մարտի 2-ից մինչև ապրիլի 22-ը Վիեննայում տեղի ունեցած Միավորված ազգերի կազմակերպության կոնֆերանսի կողմից ընդունված «Հյուպատոսական հարաբերությունների մասին» Վիեննայի կոնվենցիայի, այսուհետ` Կոնվենցիա, մասնակից պետությունները,

արտահայտելով հյուպատոսական հիմնարկների անդամների և նրանց հետ բնակվող նրանց ընտանիքների անդամների քաղաքացիության ձեռքբերմանը վերաբերող կանոնները մշակելու ցանկություն,

համաձայնեցին ներքոհիշյալի մասին.

ՀՈԴՎԱԾ 1

Սույն Արձանագրության նպատակների համար «հյուպատոսական հիմնարկի անդամներ» արտահայտությունը ունի Կոնվենցիայի 1-ին հոդվածի 1-ին կետի «է» ենթակետում սահմանված նշանակությունը, այն է` «հյուպատոսական պաշտոնատար անձինք, հյուպատոսական ծառայողներ և սպասարկող անձնակազմի անդամներ»:

ՀՈԴՎԱԾ 2

Ընդունող պետության քաղաքացիներ չհանդիսացող հյուպատոսական հիմնարկի անդամները և նրանց հետ բնակվող նրանց ընտանիքների անդամները ձեռք են բերում այդ պետության քաղաքացիություն ոչ այլ կերպ, քան ըստ ընդունող պետության օրենքների կիրառման կարգի:

ՀՈԴՎԱԾ 3

Սույն Արձանագրությունը ստորագրելու համար բաց է բոլոր այն պետությունների համար, որոնք Կոնվենցիայի մասնակիցներ կդառնան մինչև 1963 թվականի հոկտեմբերի 31-ը` Ավստրիայի Հանրապետության արտաքին գործերի դաշնային նախարարությունում, իսկ այնուհետև` մինչև 1964 թվականի մարտի 31-ը, Միավորված ազգերի կազմակերպության կենտրոնակայանում` Նյու Յորքում:

ՀՈԴՎԱԾ 4

Սույն Արձանագրությունը ենթակա է վավերացման: Վավերագրերը հանձնվում են ի պահ Միավորված ազգերի կազմակերպության գլխավոր քարտուղարին:

ՀՈԴՎԱԾ 5

Սույն Արձանագրությունը միանալու համար բաց է բոլոր այն պետությունների համար, որոնք կդառնան Կոնվենցիայի մասնակիցներ: Միանալու մասին ակտերը հանձնվում են ի պահ Միավորված ազգերի կազմակերպության գլխավոր քարտուղարին:

ՀՈԴՎԱԾ 6

1. Սույն Արձանագրությունն ուժի մեջ է մտնում ճիշտ նույն օրը, ինչ Կոնվենցիայի կամ Արձանագրության վավերացման կամ միանալու մասին ակտը Միավորված ազգերի կազմակերպության գլխավոր քարտուղարին ի պահ հանձնելուց հետո երեսուներորդ օրը` կախված այն բանից, թե այդ ամսաթվերից որը ավելի ուշ կլինի:

2. Յուրաքանչյուր այն պետության վերաբերյալ, որը վավերացնում է սույն Արձանագրությունը կամ դրան միանում է այն ուժի մեջ մտնելուց հետո, սույն հոդվածի 1-ին կետին համապատասխան, Արձանագրությունը ուժի մեջ է մտնում վավերացման կամ միանալու մասին ակտը այդ պետության կողմից ի պահ հանձնվելուց հետո երեսուներորդ օրը:

ՀՈԴՎԱԾ 7

Միավորված ազգերի կազմակերպության գլխավոր քարտուղարը բոլոր այն պետություններին, որոնք կդառնան Կոնվենցիայի մասնակիցներ, ծանուցում է.

ա) սույն Արձանագրության 3-րդ, 4-րդ և 5-րդ հոդվածներին համապատասխան ստորագրելու և վավերացման կամ միանալու մասին ակտերը ի պահ հանձնելու մասին:

բ) սույն Արձանագրության 6-րդ հոդվածին համապատասխան ուժի մեջ մտնելու ամսաթվի մասին:

ՀՈԴՎԱԾ 8

Սույն Արձանագրության բնագիրը, որի անգլերեն, իսպաներեն, չինարեն, ռուսերեն և ֆրանսերեն տեքստերը հավասարազոր են, կհանձնվի ի պահ Միավորված ազգերի կազմակերպության Գլխավոր քարտուղարին, որը դրա վավերացված պատճենները կուղարկի 3-րդ հոդվածում նշված բոլոր պետություններին:

Ի հավաստումն որի` ներքոստորագրյալները, պատշաճ կերպով լիազորված լինելով իրենց կառավարությունների կողմից, ստորագրեցին սույն Արձանագրությունը:

Կատարված է Վիեննա քաղաքում 1963 թվականի ապրիլի 24-ին:

* Արձանագրությունը Հայաստանի Հանրապետության համար ուժի մեջ է մտել 1993 թվականի հուլիսի 23-ից: