117.0275.100108
ԳՐԱՆՑՎԱԾ Է
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ԱՐԴԱՐԱԴԱՏՈՒԹՅԱՆ ՆԱԽԱՐԱՐՈՒԹՅԱՆ ԿՈՂՄԻՑ
«10» 01 2008 Թ.
ՊԵՏԱԿԱՆ ԳՐԱՆՑՄԱՆ ԹԻՎ 11708004
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՔԱՂԱՔԱՇԻՆՈՒԹՅԱՆ ՆԱԽԱՐԱՐ ՀՐԱՄԱՆ
14 դեկտեմբերի 2007 թվականի N 275-Ն
i
ՍԵՅՍՄԱՄԵԿՈՒՍԱՑՄԱՆ ՇԵՐՏԱՎՈՐ ՌԵՏԻՆԱՄԵՏԱՂԵ ՀԵՆԱՐԱՆՆԵՐԻ ՏԵԽՆԻԿԱԿԱՆ ՎԻՃԱԿԻ ՀԵՏԱԶՆՆՈՒԹՅԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ
Հիմք ընդունելով Հայաստանի Հանրապետության կառավարության 2007 թվականի հոկտեմբերի 4-ի N 1161-Ն որոշման 3-րդ կետի 1-ին ենթակետը.
ՀՐԱՄԱՅՈՒՄ ԵՄ`
1. Հաստատել սեյսմամեկուսացման շերտավոր ռետինամետաղե հենարանների տեխնիկական վիճակի հետազննության կարգը` համաձայն հավելվածի:
2. Սույն հրամանի կատարման հսկողությունը դնել նախարարի տեղակալ Կ. Գևորգյանի վրա:
Հավելված
ՀՀ քաղաքաշինության նախարարի
2007 թվականի դեկտեմբերի 14-ի
N 275-Ն հրամանի
ԿԱՐԳ
ՍԵՅՍՄԱՄԵԿՈՒՍԱՑՄԱՆ ՇԵՐՏԱՎՈՐ ՌԵՏԻՆԱՄԵՏԱՂԵ ՀԵՆԱՐԱՆՆԵՐԻ ՏԵԽՆԻԿԱԿԱՆ ՎԻՃԱԿԻ ՀԵՏԱԶՆՆՈՒԹՅԱՆ
I. ԸՆԴՀԱՆՈՒՐ ԴՐՈՒՅԹՆԵՐ
1. Սույն կարգով սահմանվում են նոր կառուցվող շենքերի ու շինությունների սեյսմակայունության համակարգերում և գոյություն ունեցող շենքերի ու շինությունների սեյսմակայունության բարձրացման նպատակով որպես կառուցվածքային տարր նախատեսված սեյսմամեկուսացման շերտավոր ռետինամետաղե հենարանների (այսուհետ` ՍՇՌՄՀ) տեխնիկական վիճակի հետազննության, այսինքն` դիտողական ու դիտողագործիքային հետազննության և արդյունքում ՍՇՌՄՀ-ների հետագա անվտանգ շահագործման գնահատման դրույթները, ինչպես նաև դրանց փոխարինման անհրաժեշտության դեպքերը:
2. ՍՇՌՄՀ-ների տեխնիկական վիճակի առաջին հետազննությունը պետք է կատարվի դրանց տեղակայելուց հետո մեկ տարի անց և հետագայում` առնվազն 10 տարին մեկ անգամ:
3. ՍՇՌՄՀ-ների տեխնիկական վիճակի հետազննությունը կատարվում է նաև.
1) շենքի գործառական նշանակության փոփոխության դեպքում.
2) շահագործման պայմանների փոփոխության, մասնավորապես` ազդող բեռների մեծացման դեպքում.
3) հրդեհից, հաշվարկային մակարդակի կեսը գերազանցող ուժգնությամբ յուրաքանչյուր երկրաշարժից հետո:
II. ՍՇՌՄՀ-ՆԵՐԻ ԴԻՏՈՂԱԿԱՆ ՀԵՏԱԶՆՆՈՒԹՅՈՒՆ
4. Դիտողական հետազննությունը կատարվում է շենքի սեփականատիրոջ, բազմաբնակարան շենքում` կառավարման մարմնի կամ նրա կողմից լիազորված անձի միջոցով, անհրաժեշտության դեպքում մասնագիտացված կազմակերպության ներգրավմամբ:
5. Դիտողական հետազննության ժամանակ ի հայտ են բերվում և նշվում են (անհրաժեշտության դեպքում լուսանկարվում են) յուրաքանչյուր ՍՇՌՄՀ-ի երևացող թերությունները, դեֆորմացիաները, մաշվածքը, կողմնային մակերևույթների վնասվածքները, մակերևութային ճաքերի առկայությունն ու տեղաբաշխման բնույթը, ինչպես նաև մեխանիկական, կոռոզիոն, այրվածքային և այլ տիպի վնասվածքները, տարատեսակ սահմանափակիչների առկայության դեպքում նրանց վիճակը:
Հետազննության ժամանակ անհրաժեշտ է ստուգել շենքի ինժեներական հաղորդակցուղիների միացումների ճկունության անկումը, մաշվածքի առկայությունը և կառուցվածքի (շենքի) շուրջը նախատեսված սեյսմիկ բացակի համապատասխանությունը նախագծային լուծումներին:
III. ՍՇՌՄՀ-ՆԵՐԻ ԴԻՏՈՂԱԳՈՐԾԻՔԱՅԻՆ ՀԵՏԱԶՆՆՈՒԹՅՈՒՆ
6. ՍՇՌՄՀ-ների դիտողագործիքային հետազննությունը կատարվում է բնագավառի մասնագիտացված կազմակերպության կողմից:
7. Դիտողագործիքային հետազննության ժամանակ, բացի սույն կարգի 5-րդ կետում նշված աշխատանքներից, կատարվում են նաև`
1) դեֆորմացիաների չափումներ,
2) ճաքերի բացվածքի լայնության և երկարության չափումներ,
3) ռետինե կարծրության որոշում (ըստ Շոռի «Ա»): ՍՇՌՄՀ-ների ռետինի կարծրությունը որոշվում է յուրաքանչյուր հենարանի համար` դրանց կողմնային մակերևույթների վրա, առնվազն երեք կետում,
4) շենքի միկրոտատանումների գրանցումներ` համապատասխան գրանցող սարքերի միջոցով: Գրանցող սարքերը տեղադրվում են ՍՇՌՄՀ-ներից անմիջապես ցածր և բարձր գտնվող կոնստրուկտիվ տարրերի վրա, ինչպես նաև տարբեր հարկերում և տանիքում:
8. Շենքի միկրոտատանումների իրական մեծությունը պետք է որոշվի հիստերեզիսային կորերի (օղակների) միջոցով: Վերջիններս կառուցվում են յուրաքանչյուր ՍՇՌՄՀ-ի համար` փորձարկման արդյունքների հիման վրա մինչև դրա կիրառումը:
Եթե առաձգական փուլում կոշտության արժեքը մեծ է թույլատրելի հաշվարկային մեծությունից, ապա այդ դեպքում մեկ անգամ ևս պետք է հետազննվեն ՍՇՌՄՀ-ների բացակները, ինչպես շենքի ներսում, այնպես էլ դրսից և վերացվեն բոլոր արհեստականորեն ստեղծված կապերը, որոնք կարող են պատճառ լինել սեյսմամեկուսացման համակարգի կոշտացմանը:
IV. ՍՇՌՄՀ-ՆԵՐԻ ՀԵՏԱԳԱ ԱՆՎՏԱՆԳ ՇԱՀԱԳՈՐԾՄԱՆ ԳՆԱՀԱՏՈՒՄԸ, ԴՐԱՆՑ ՓՈԽԱՐԻՆՄԱՆ ԴԵՊՔԵՐԸ
9. ՍՇՌՄՀ-ների հետագա անվտանգ շահագործման գնահատականը տրվում է դրանց տեխնիկական վիճակի հետազննության արդյունքների և անձնագրային տվյալներին համապատասխանության հիման վրա:
10. ՍՇՌՄՀ-ների հետագա շահագործման ոչ պիտանիության գնահատականը տրվում է եթե`
1) ռետինի կարծրությունը տարբերվում է նախագծայինից ավելի, քան +-10%-ով.
2) մնացորդային դեֆորմացիան գերազանցում է հենարանի արտաքին տրամագծի 20%-ը (0.2D).
3) ՍՇՌՄՀ-ներում առաջացել են չափազանց մեծ կամ անհավասարաչափ ուղղաձիգ դեֆորմացիաներ.
4) ՍՇՌՄՀ-ների կողային մակերևույթին հայտնաբերված ճաքերի երկարության ու խորության մեծությունները և քանակը գերազանցում են N1 աղյուսակով սահմանված ցուցանիշները:
11. Այն ՍՇՌՄՀ-ները, որոնցում դիտողական և դիտողագործիքային հետազննման արդյունքում արձանագրվել են 10 կետում նշված բնութագրերից որևէ մեկը, պետք է փոխարինվեն: Փոխարինման են ենթակա նաև վնասված սահմանափակիչները:
12. ՍՇՌՄՀ-ների փոխարինումը իրականացվում է մասնագիտական կազմակերպության կողմից` սահմանված կարգով հաստատված նախագծային փաստաթղթերի հիման վրա:
13. Այն շենքերում, որոնցում դիտողական և դիտողագործիքային հետազննման արդյունքում հայտնաբերվել են փոխարինման ենթակա ՍՇՌՄՀ-ներ, մնացած ՍՇՌՄՀ-ներից ընտրանքային կարգով ընտրված առնվազն երեքը պետք է ենթարկվեն փորձարկումների:
Եթե փորձարկման արդյունքներով դրանցից առնվազն մեկը ունի շեղում սահմանված բնութագրերից, ապա այն ենթակա է փոխարինման: Այդ դեպքում շենքի մնացած ՍՇՌՄՀ-ները ևս ենթարկվում են փորձարկման:
Աղյուսակ 1
ՍԵՅՍՄԱՄԵԿՈՒՍԱՑՄԱՆ ՇԵՐՏԱՎՈՐ ՌԵՏԻՆԱՄԵՏԱՂԵ ՀԵՆԱՐԱՆՆԵՐԻ ՀՈՐԻԶՈՆԱԿԱՆ ՏԵՂԱՇԱՐԺԻ ԺԱՄԱՆԱԿ ԱՌԱՋԱՑԱԾ ՄԱԿԵՐԵՎՈՒԹԱՅԻՆ ՃԱՔԵՐԻ ԵՐԿԱՐՈՒԹՅԱՆ, ԽՈՐՈՒԹՅԱՆ ԵՎ ՔԱՆԱԿԻ ԹՈՒՅԼԱՏՐԵԼԻ ՇԵՂՈՒՄՆԵՐԻ ՄԵԾՈՒԹՅՈՒՆԸ
.______________________________________________________.
| Ճաքի | Ճաքի | Ճաքերի քանակը, |
| երկարությունը, սմ | խորությունը, մմ | ոչ ավելի |
|___________________|_________________|________________|
| 3 | 1 | 4 |
| 3 | 2 | 3 |
| 3 | 3 | 2 |
| 4 | 1 | 3 |
| 4 | 2 | 2 |
| 4 | 3 | 1 |
| 5 | 1 | 2 |
| 5 | 2 | 1 |
| 6 | 1 | 1 |
.______________________________________________________.