040.0320.030414
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
ՈՐՈՇՈՒՄ
13 մարտի 2014 թվականի N 320-Ա
i
«ՔՎԱՆՏ» ՈՒՍՈՒՄՆԱԳԻՏԱԿԱՆ ԿՈՈՊԵՐԱՏԻՎԻՆ ԱՆՀԱՏՈՒՅՑ ՕԳՏԱԳՈՐԾՄԱՆ ԻՐԱՎՈՒՆՔՈՎ ԳՈՒՅՔ ՀԱՆՁՆԵԼՈՒ ԵՎ ՆՎԻՐԱԲԵՐԵԼՈՒ ՄԱՍԻՆ
Հիմք ընդունելով Հայաստանի Հանրապետության քաղաքացիական օրենսգրքի 605-րդ հոդվածի, «Բաժնետիրական ընկերությունների մասին» Հայաստանի Հանրապետության օրենքի 67-րդ հոդվածի 1-ին կետի «ը» ենթակետի, 68-րդ հոդվածի 7-րդ կետի, «Պետական կառավարչական հիմնարկների մասին» Հայաստանի Հանրապետության օրենքի 4-րդ հոդվածի դրույթները, ինչպես նաև ղեկավարվելով Հայաստանի Հանրապետության կառավարության 2013 թվականի հուլիսի 10-ի N 805-Ն որոշմամբ սահմանված կարգով և Հայաստանի Հանրապետության կառավարության 2011 թվականի հուլիսի 10-ի N 304-Ն որոշմամբ հաստատված կարգի 3-րդ կետի 6-րդ ենթակետով` Հայաստանի Հանրապետության կառավարությունը որոշում է.
1. Թույլատրել «Չափագիտության ազգային ինստիտուտ» փակ բաժնետիրական ընկերությանը (այսուհետ` ընկերություն) սեփականության իրավունքով իրեն պատկանող` Երևան քաղաքի Բագրատունյաց 23/3 հասցեում գտնվող` 308.9 քառ. մետր ընդհանուր մակերեսով, 5585.2 հազ. դրամ հաշվեկշռային արժեքով շինություններով և դրանց սպասարկման համար անհրաժեշտ` 494.85 քառ. մետր հողամասով (այսուհետ` անշարժ գույք) վճարել ընկերության կողմից տեղաբաշխված, պետությանը պատկանող համապատասխան թվով բաժնետոմսերի` Հայաստանի Հանրապետության օրենսդրությամբ սահմանված կարգով ձեռքբերման դիմաց:
2. Ընկերության կողմից ձեռք բերված բաժնետոմսերի մարումից հետո` Հայաստանի Հանրապետության օրենսդրությամբ սահմանված կարգով` համապատասխան չափով նվազեցնել ընկերության կանոնադրական կապիտալը:
3. Սույն որոշման 1-ին կետում նշված գույքի առանձնացման ժամանակ հաշվարկվող ավելացված արժեքի հարկը վճարել «Հայաստանի Հանրապետության 2014 թվականի պետական բյուջեի մասին» Հայաստանի Հանրապետության օրենքի 9-րդ հոդվածի 11-րդ կետով սահմանված կարգով:
4. Հայաստանի Հանրապետության անունից ձեռք բերված` սույն որոշման 1-ին կետում նշված անշարժ գույքն ամրացնել «Հայաստանի Հանրապետության կառավարությանն առընթեր պետական գույքի կառավարման վարչության աշխատակազմ» պետական կառավարչական հիմնարկին` ապահովելով գույքի նկատմամբ սեփականության իրավունքի պետական գրանցումը:
5. «Հայաստանի Հանրապետության կառավարությանն առընթեր պետական գույքի կառավարման վարչության աշխատակազմ» պետական կառավարչական հիմնարկին ամրացված` Երևան քաղաքի Բագրատունյաց 23/4 հասցեում գտնվող` 2859.52 քառ. մետր մակերեսով անշարժ գույքը և դրա զբաղեցրած ու սպասարկման համար անհրաժեշտ` 0.208041 հեկտար հողամասը հետ վերցնել «Երևանի Հ. Ավետիսյանի անվան Հ. 74 հիմնական դպրոց» պետական ոչ առևտրային կազմակերպությունից:
6. Հայաստանի Հանրապետության կառավարությանն առընթեր պետական գույքի կառավարման վարչության պետին` սույն որոշումն ուժի մեջ մտնելուց հետո
երկամսյա ժամկետում «Երևանի Հ. Ավետիսյանի անվան Հ. 74 հիմնական դպրոց» պետական ոչ առևտրային կազմակերպության հետ կնքել 2013 թվականի ապրիլի 5-ին կնքված N 48/0013 ոչ բնակելի տարածքի անհատույց օգտագործման պայմանագիրը սույն որոշման 5-րդ կետում նշված գույքի մասով լուծելու մասին համաձայնագիր` սահմանելով, որ համաձայնագրից ծագող գույքային իրավունքների պետական գրանցման ծախսերը ենթակա են իրականացման` «Երևանի Հ. Ավետիսյանի անվան Հ. 74 հիմնական դպրոց» պետական ոչ առևտրային կազմակերպության միջոցների հաշվին:
7. Հայաստանի Հանրապետության սեփականությունը հանդիսացող` Երևան քաղաքի Բագրատունյաց 23/3 հասցեում գտնվող` 24998.0 հազ. դրամ գնահատված արժեքով, 308.9 քառ. մետր ընդհանուր մակերեսով շենքը և դրա սպասարկման համար անհրաժեշտ` 494.85 քառ. մետր մակերեսով հողամասը, Բագրատունյաց 23/4 հասցեում գտնվող` 160365.0 հազ. դրամ գնահատված արժեքով, 2859.52 քառ. մետր մակերեսով շենքը և դրա զբաղեցրած ու սպասարկման համար անհրաժեշտ` 0.208041 հեկտար հողամասը (այսուհետ` գույք 1) անհատույց օգտագործման իրավունքով տրամադրել «Քվանտ» ուսումնագիտական կոոպերատիվին (այսուհետ` կազմակերպություն) (գտնվելու վայրը` քաղ. Երևան, Բագրատունյաց 23):
8. Հայաստանի Հանրապետության սեփականությունը հանդիսացող` Երևան քաղաքի Բագրատունյաց 23/2 հասցեում գտնվող` 335667.0 հազ. դրամ գնահատված արժեքով, 2334.2 քառ. մետր մակերեսով շենքը և դրա զբաղեցրած ու սպասարկման համար անհրաժեշտ` 0.2776 հեկտար հողամասը (այսուհետ` գույք 2), բացառապես հանրակրթական նպատակներով օգտագործելու նպատակով, նվիրաբերել կազմակերպությանը:
9. Հայաստանի Հանրապետության կառավարությանն առընթեր պետական գույքի կառավարման վարչության պետին` սույն որոշման 4-րդ և 6-րդ կետերում նշված աշխատանքների ավարտից հետո եռամսյա ժամկետում կազմակերպության հետ կնքել`
1) սույն որոշման 7-րդ կետում նշված գույք 1-ի անհատույց օգտագործման մասին պայմանագիր` դրանում նախատեսելով, որ գույք 1-ի վերանորոգման, գույքի ձեռքբերման, ինչպես նաև «Երևանի Հ. Ավետիսյանի անվան Հ. 74 հիմնական դպրոց» պետական ոչ առևտրային կազմակերպության մարզադահլիճի և սանհանգույցների վերանորոգման նպատակով կազմակերպությունը պարտավոր է երեք տարվա ընթացքում կատարել 39 մլն դրամի ներդրումներ` յուրաքանչյուր տարի հավասարաչափ.
2) սույն որոշման 8-րդ կետում նշված գույք 2-ի նվիրաբերության մասին պայմանագիր` դրանում նախատեսելով, որ`
ա. համաձայն ներկայացված ներդրումային ծրագրի` կազմակերպությունը պարտավոր է գույքի վերանորոգման, գույքի ձեռքբերման, ուսման վարձերի փոխհատուցման համար հինգ տարվա ընթացքում կատարել 58 մլն դրամի ներդրումներ` համաձայն հավելվածի,
բ. սույն ենթակետի «ա» պարբերության մեջ նշված ներդրումային ծրագրի բացասական ընթացիկ գնահատականի դեպքում ներդրումային ծրագրի կատարումը բարելավելու համար սահմանվում է մեկ տարի ժամկետ,
գ. երկու տարի շարունակ ներդրումային ծրագրի բացասական ընթացիկ գնահատականի դեպքում նվիրաբերողը միջոցներ է ձեռնարկում նվիրաբերությունը վերացնելու համար, որի արդյունքում Հայաստանի Հանրապետության կառավարության որոշմամբ գույքը վերադարձվում է նվիրաբերողին կամ նրա իրավահաջորդին,
դ. կազմակերպության սեփականատիրոջ փոփոխության, ինչպես նաև լուծարման դեպքում նոր սեփականատիրոջն է փոխանցվում նվիրաբերության պայմանի կատարման պարտավորությունը,
ե. անշարժ գույքը նվիրաբերության պայմանին անհամապատասխան օգտագործելու դեպքում նվիրաբերողը կամ նրա իրավահաջորդն իրավունք ունի պահանջելու նվիրաբերության վերացում, որի արդյունքում անշարժ գույքը վերադարձվում է նվիրաբերողին կամ նրա իրավահաջորդին:
10. Սահմանել, որ`
1) անհատույց օգտագործման և նվիրաբերության մասին պայմանագրերի նոտարական վավերացման և պայմանագրերից ծագող գույքային իրավունքների պետական գրանցման հետ կապված ծախսերը ենթակա են իրականացման` կազմակերպության միջոցների հաշվին.
2) կազմակերպությունը պարտավոր է ընկերությանը փոխհատուցել սույն որոշման 1-ին կետում նշված գույքի նկատմամբ իրավունքի պետական գրանցման համար վերջինիս կողմից կատարված` 5585.2 հազ. դրամ ծախսերը.
3) ընկերության կանոնադրության փոփոխությունը պետական գրանցման ներկայացնելու հետ կապված ծախսերն իրականացվելու են ընկերության միջոցների հաշվին:
11. Հայաստանի Հանրապետության կառավարությանն առընթեր պետական գույքի կառավարման վարչության պետին` սույն որոշման 9-րդ կետի 1-ին ենթակետում նշված ներդրումները կազմակերպության կողմից կատարվելուց հետո` երկամսյա ժամկետում Հայաստանի Հանրապետության կառավարություն ներկայացնել առաջարկություն սույն որոշման 7-րդ կետում նշված գույք 1-ը Հայաստանի Հանրապետության կառավարության 2013 թվականի հուլիսի 10-ի «Հանրակրթական ծրագրեր իրականացնող ոչ պետական կազմակերպություններին Հայաստանի Հանրապետության պետական սեփականություն հանդիսացող անշարժ գույք նվիրաբերելու կարգը հաստատելու մասին» N 805-Ն որոշմամբ սահմանված կարգով կազմակերպությանը նվիրաբերելու վերաբերյալ:
ՍՏՈՐԱԳՐՎԵԼ Է ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏԻ ԿՈՂՄԻՑ
2014 ԹՎԱԿԱՆԻ ԱՊՐԻԼԻ 3-ԻՆ
Հավելված
ՀՀ կառավարության
2014 թվականի մարտի 13-ի
N 320-Ա որոշման
ԺԱՄԱՆԱԿԱՑՈՒՅՑ «ՔՎԱՆՏ» ՈՒՍՈՒՄՆԱԳԻՏԱԿԱՆ ԿՈՈՊԵՐԱՏԻՎԻ ԿՈՂՄԻՑ ԻՐԱԿԱՆԱՑՎՈՂ ՆԵՐԴՐՈՒՄՆԵՐԻ
._____________________________________________________________________.
|Տեսակը |Ընդամենը| Տարեկան ներդրումները |
| | | (հազ. դրամ) |
| | |____________________________________|
| | |առաջին|երկրորդ|երրորդ|չորրորդ|հինգե-|
| | |տարի |տարի |տարի |տարի |րորդ |
| | | | | | |տարի |
|_______________________|________|______|_______|______|_______|______|
|Շինվերանորոգում, գույքի| 4000.0|1000.0| 1000.0| 800.0| 800.0| 400.0|
|ձեռքբերում | | | | | | |
|_______________________|________|______|_______|______|_______|______|
|Հանրակրթության ոլորտում| 4000.0| 600.0| 600.0| 600.0| 1000.0|1200.0|
|նորարարական, | | | | | | |
|ուսումնատեխնիկական | | | | | | |
|բազայի արդիականացում | | | | | | |
|_______________________|________|______|_______|______|_______|______|
|Սոցիալապես անապահով | 45000.0|9000.0| 9000.0|9000.0| 9000.0|9000.0|
|ընտանիքների և օժտված | | | | | | |
|երեխաների կրթության | | | | | | |
|հովանավորում | | | | | | |
|_______________________|________|______|_______|______|_______|______|
|Աշխատողների | 5000.0|1000.0| 1000.0|1000.0| 1000.0|1000.0|
|մասնագիտական | | | | | | |
|կարողությունների | | | | | | |
|կատարելագործմանն | | | | | | |
|ուղղված ներդրումներ | | | | | | |
|_______________________|________|______|_______|______|_______|______|
|Ընդամենը | 58000| 11600| 11600| 11400| 11800| 11600|
._____________________________________________________________________.