(ուժը կորցրել է 04.06.01 թիվ 189 հրաման)
i
102.0067.220200
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՐԴԱՐԱԴԱՏՈՒԹՅԱՆ ՆԱԽԱՐԱՐԻ
ՀՐԱՄԱՆ
21 փետրվարի 2000 թվականի թիվ 67
i
ՊԵՏԱԿԱՆ ՆՈՏԱՐԱԿԱՆ ԳՐԱՍԵՆՅԱԿՈՒՄ ՆՈՏԱՐԻ ՄՈՏ ՍՏԱԺԱՎՈՐՈՒՄ ԱՆՑՆԵԼՈՒ ԿԱՐԳԸ ՀԱՍՏԱՏԵԼՈՒ ՄԱՍԻՆ
«Պետական նոտարիատի մասին» Հայաստանի Հանրապետության օրենքի 5 հոդվածի և Հայաստանի Հանրապետության վարչապետի 1997 թվականի նոյեմբերի 14-ի թիվ 532 որոշմամբ հաստատված Հայաստանի Հանրապետության արդարադատության նախարարության կանոնադրության 5-րդ կետի ժզ ենթակետի համապատասխան հրամայում եմ`
1. Հաստատել «Պետական նոտարական գրասենյակում նոտարի մոտ ստաժավորում անցկացնելու կարգը»:
2. Սույն կարգի պահանջների պահպանման նկատմամբ հսկողությունը դնել Հայաստանի Հանրապետության արդարադատության նախարարի տեղակալ Գ. Մալխասյանի վրա:
ՀԱՍՏԱՏՎԱԾ Է
ՀՀ ԱՐԴԱՐԱԴԱՏՈՒԹՅԱՆ ՆԱԽԱՐԱՐԻ
2000 ԹՎԱԿԱՆԻ
ԹԻՎ ՀՐԱՄԱՆՈՎ
ԿԱՐԳ
ՊԵՏԱԿԱՆ ՆՈՏԱՐԱԿԱՆ ԳՐԱՍԵՆՅԱԿՈՒՄ ՆՈՏԱՐԻ ՄՈՏ ՍՏԱԺԱՎՈՐՈՒՄ ԱՆՑՆԵԼՈՒ
1. «Պետական նոտարիատի մասին» Հայաստանի Հանրապետության օրենքի 5 հոդվածի համաձայն նոտարի պաշտոնում կարող է նշանակվել Հայաստանի Հանրապետության այն քաղաքացին, որն ունի բարձրագույն իրավաբանական կրթություն, անցել է առնվազն մեկ տարի տևողությամբ ստաժավորում պետական նոտարական գրասենյակում, հանձնել է որակավորման քննություն:
Առանձին դեպքերում, երբ ստաժավորում անցնող անձը, ունենալով բավարար գիտելիքներ կարող է հանձնել որակավորման քննություններ, ստաժավորման ժամկետը կարող է կրճատվել Հայաստանի Հանրապետության արդարադատության նախարարի կողմից: Եթե կարճաժամկետ ստաժավորում անցած անձը չի հանձնում որակավորման քննությունները, ապա նա իրավունք ունի շարունակել ստաժավորումը մինչև ժամկետի ավարտը:
Ստաժավորման տևողությունը կարող է երկարացվել ստաժավորումն անցնողի հիվանդության կամ այլ հարգելի պատճառներով նրա բացակայության ժամկետով` Հայաստանի Հանրապետության արդարադատության նախարարի հրամանով:
2. Պետական նոտարական գրասենյակում ստաժավորում անցնողի պաշտոնում նշանակումը կատարվում է Հայաստանի Հանրապետության արդարադատության նախարարի հրամանով` պետական նոտարի նախատեսվող կամ առկա թափուր տեղ լինելու դեպքում, ոչ ավելի քան յուրաքանչյուր տեղի համար երկու անձ:
Ստաժավորում անցնելու նպատակով ստաժավորում անցնողները կարող են աշխատանքային պայմանագրի հիման վրա նշանակվել պետական նոտարի խորհրդականի թափուր պաշտոնում:
Ստաժավորում անցնողի աշխատանքի վարձատրությունը կատարվում է միայն, եթե Հայաստանի Հանրապետության արդարադատության նախարարությանը հատկացված միջոցներով նախատեսված է նման վարձատրություն:
Ստաժավորում անցնողը աշխատանքի պայմանների, աշխատանքային ժամանակի հարցերում օգտվում է նոտարների համար սահմանված բոլոր իրավունքներից: Ստաժավորում անցնողների վրա տարածվում են աշխատանքային ներքին կարգապահության կանոնները:
3. Պետական նոտարական գրասենյակում ստաժավորում անցնողի աշխատանքի անմիջական ղեկավարումն իրականացվում է այն նոտարի կողմից, որի վրա Հայաստանի Հանրապետության արդարադատության նախարարի հրամանով դրվել է այդ գործառույթը: Ստաժավորում անցնող անձի դիմումի համաձայն Հայաստանի Հանրապետության արդարադատության նախարարը փոխարինում է ստաժավորում անցնող անձի ղեկավարին:
Այդ գործառույթի իրականացման համար Հայաստանի Հանրապետության արդարադատության նախարարի կողմից կարող է սահմանվել նոտարի պաշտոնեական դրույքաչափի հավելավճար:
4. Պետական նոտարական գրասենյակում աշխատող նոտարը միաժամանակ կարող է իրականացնել ոչ ավելի, քան մեկ ստաժավորում անցնողի ղեկավարման աշխատանք:
5. Ստաժավորում անցնողի պարտականությունների մեջ է մտնում. նոտարական փաստաթղթերի նախագծերի պատրաստումը, այցելուների ընդունելությունը, ներկայացված փաստաթղթերի ուսումնասիրումը և դրանք օրենսդրության համապատասխանությանը վերաբերյալ եզրակացության ներկայացումը, նոտարական գրասենյակում պահվող իրավական ակտերի համակարգումը և վերահսկչական վիճակում պահումը, իրավաբանական բնույթի գրավոր հարցումների կամ դրանց պատասխանների նախագծերի նախապատրաստումը, նոտարական գործերը արխիվ հանձնելուն նախապատրաստումը, նոտարի հանձնարարությամբ գործավարական աշխատանքների իրականացումը:
Ստաժավորում անցնողը մասնակցում է նոտարական պրակտիկայի ամփոփմանը և նախապատրաստում է դրանց իրագործման վերաբերյալ առաջարկություններ:
6. Ստաժավորման ընթացքում ստաժավորում անցնողը պարտավոր է յուրացնել նոտարիատի հետ առընչվող հարաբերությունները կարգավորող իրավական ակտերը` այդ թվում նաև Հայաստանի Հանրապետության արդարադատության նախարարության` նոտարիատի գործունեությունը կանոնակարգող հրամանները:
7. Ստաժավորման ավարտին ստաժավորում անցնողի ղեկավարը կազմում է եզրակացություն ստաժավորման արդյունքների մասին, որտեղ արտացոլվում է ստաժավորում անցնողի ընդհանուր պատրաստվածության մակարդակը, ստաժավորման ընթացքում նրա կողմից ստացված պրակտիկ հմտությունները և գիտելիքները, ինչպես նաև ինքնուրույն աշխատանքի համար ստաժավորում անցնողի պատրաստության աստիճանը: Եզրակացության մեկ օրինակը պահվում է Հայաստանի Հանրապետության արդարադատության նախարարությունում, իսկ մյուսը տրվում է ստաժավորում անցնողին:
8. Ստաժավորման արդյունքների մասին եզրակացությունը կցվում է որակավորման քննություններ հանձնելու դիմումին: Քննությանը մասնակցել թույլատրվում է ստաժավորում անցած բոլոր անձանց, անկախ ստաժավորման ղեկավարի գնահատականից:
9. Նոտարական գործունեությամբ զբաղվելու ցանկություն ունեցող և նոտարական գործունեության ղեկավարման գործառույթներ իրականացնող Հայաստանի Հանրապետության արդարադատության նախարարության ղեկավար պաշտոնատար անձինք նոտարի պաշտոնում նշանակվում են առանց ստաժավորում անցնելու և առանց որակավորման քննություններ հանձնելու:
Նոտարական գործունեությամբ զբաղվելու ցանկություն ունեցող Հայաստանի Հանրապետության արդարադատության նախարարության այն մասնագետների աշխատանքի տևողությունը, որը կապված է նոտարական գործունեության ղեկավարման կամ վերահսկողության գործառույթների հետ, ընդգրկվում է ստաժավորման տևողության հաշվարկում: Նշված անձանց թույլատրվում է հանձնել որակավորման քննություն այն դեպքում, երբ նրանք ունեն նշված գործառույթների իրականացման հետ կապված պաշտոններում աշխատանքի առնվազն մեկ տարվա ստաժ:
Նոտարական գործունեությամբ զբաղվելու ցանկություն ունեցող Հայաստանի Հանրապետության արդարադատության նախարարության այն աշխատողները (ղեկավարներ և մասնագետներ), որոնց աշխատանքային գործառույթները կապված են օրենսդրական հարցերի հետ (նախագծերի նախապատրաստում, փորձաքննություն և այլն) ստաժավորում են անցնում Հայաստանի Հանրապետության արդարադատության նախարարի կողմից սահմանված կրճատ ժամկետներում:
10. Ստաժավորումն անցնող անձը կարող է ազատվել ստաժավորվողի պաշտոնից Հայաստանի Հանրապետության աշխատանքային օրենսգրքով աշխատողին աշխատանքից ազատելու համար նախատեսված դեպքերում և կարգով:
ԳՐԱՆՑՎԱԾ Է ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՐԴԱՐԱԴԱՏՈՒԹՅԱՆ ՆԱԽԱՐԱՐՈՒԹՅԱՆ ԿՈՂՄԻՑ «22» 02 2000 Թ. ՊԵՏԱԿԱՆ ԳՐԱՆՑՄԱՆ ԹԻՎ 10200014